تكلمة بوست الاسبوع الى فات عن اول طريق البرامج “كان نفسى لما ابدأ الاقي حد يقولي”
علشان تدخل مجال الجرافيك و تبقى قوي فيه لازم تجرب البرامج كتير وتمسك كاميرا وترسم وتجرب مجالات كتير الكلام ده يبان صعب ومستحيل بس انت لسه قدامك العمر كله.
مميزات
صدقني لما تبقى شغال وفاهم والمدير بيعتمد عليك في اي حاجة بتبقى احلى مش بقول بتشتغل في كل حاجة بس عارف ساعات الشركة ممكن يطلب منها تصوير مثلا فا تلاقي المدير خدك معاه السشن علشان انت فاهم في التصوير اعلى منه فا عاوزك انت الي تشرف بتبقي زي عمود في الشركة وممكن توصل انه يسافر او يبعد ويسيبك مكانه وانك تسيب الشركة ده بيعمل ازمة فى المكان.
انت نفسك بتبقى عارف حجات كتتير وسريع جدا غير ناس تانية ده غير ان في حاجات بتتعمل في ايام انت بتعملها بزرار لمجرد انك كنت فاتح ال ان ديزاين قبل كده مثلا.
ازاى اتعلم كل ده
الموضوع بسيط انت هتدخل على اليوتيوب او جوجل و تكتب جمب اسم البرنامج كلمة كورسات لو عايزة بالعربي و كلمة tutorial هتلاقي ناس كتير افضل اتفرج وشوف الي بتستريح معاه.
* لو بتشوف عربي اعمل سرعة الفيديو 1.5 علشان في ناس كتير بتضيع وقت كتير فى الكلام.
*انك تشوف دورة كاملة جايبة البرنامج من اولة لاخرة احسن من كورسات كتير متقطعة.
*الانجليزى افضل في الكورسات فا لو تشوف حاجة ليها ترجمة او تشوف و تحاول تفهم يبقى احسن.
*اغلب الاماكن بتاعت الكورسات مش كويسة وبالذات المركز الثقافى الروسي.
ايه هيا البرامج الي هتعلمها او الحاجات الى المفروض اذاكرها
نبتدى ب Adobe Photoshop
ده عمود المصمم لازم كل واحد داخل مهما كان مجالة يعدي على ده يتعلمة الفوتشوب باختصار هوا برنامج تعديل على الصور وتصحيح الاضائة والدمج واغل شغل الاعلانات بيتعمل عليه برنامج مش بيخلص لو قعدت تتعلمة.
برنامج adobe Illustrator ادوبى اليستروتر
ده اصعب حاجة فيه نطق اسمة 
😂😂😂 عادي انا قعدت 3 اسابيع اعرف انطق اسمة هوا برنامج بيفهم بيحب الرسم وماشي بنظام اسمة فيكتور لما تشوف الفيديو هتفهم علشان تعمل لوجو او اي حاجة بتترسم او حاجة مفهاش صور يبقى البرامج ده الناس بتخاف تدخلة في الاول بعد الفوتوشب بس هوا برنامج هيحسسك انك مصمم جرافيك و هيفرقك عن الناس الي لسه بتبتدى.
برنامج Adobe In Design
ده حاجة عاملة زي الورد بس مكبرة شوية محترم جدا في اي حاجة اكتر من ورقة وساعات بنستخدمة في تصميم المقاسات الكبيرة علشان امكانيات الجهاز وكده برنامج هياخد منك اسبوع تتعلمة بس هينجزك في حاجات كتتتير و يعتبر اخف برامج التصميم.
برنامج Adobe Light room
ده برنامج بيعشق الصور وتعديل الونها ممكن تعدل اضائة 100 مع بعض لانه بيفتح الصور كلها ويخليك تقدر تعدل صور مع صور على عكس لو جربت الحكاية دي مع الفوتوشوب هتاخد شهر بتعدل اضائة تقريبا برنامج خفيف و جميل للناس الي فاهمة اضائة.
برنامج adobe premiere pro
ده برنامج للمونتاج الفيديو من تقطيع صور واعادئة تظبيط الاضائة بتاعتها.
برنامج Adobe After Effect
ده ليه استخدامين الاول انه موشن جرافيك و انميشن ” كارتون و كده بس بسيط جداا ” او الجزء التانى المؤثرات البصرية تقدر تقول عليه كده فوتوشب الفيديو.
برنامج adobe audition
ده للصوت والتعديل عليه.
برنامج adobe Dreamweaver
ده للمواقع و الابلكيشن.
طبعا لازم تجرب التصوير العادى و بعدين كاميرا بروفيشنال و تصوير الفيديو تتعلم اساسيات رسم و تجرب ايدك و عادى انك مبترعفش ترسم.
نكمل بقى الاسبوع الجاى
لمتابعة اعمال الزميل: احمد جمال
