#صمم_تبقي_مصمم هنكمل باقى المغالطات المنطقيه لانه موضوع مهم جدااا
11- انا مش بعرف اطلع افكار اذا انا فاشل
الحقيقه لا لان عضله المخ زى اى عضله محتاج تدريب واهتمام وتستخدم كتيرررر والا هتضمر ولكن مش هتموت محتاجه منك تتعب عليها يعنى ما تستسهلش انك تجيب حاجه من على النت جاهزه او شتراستوك او اى موقع لا محتاج تتعب وتفكر مره فى مره هتلاقي الافكار بتجيلك زى ما بتتنفس عادى الامر طبيعى (التكرر ام المهاره )
12- انا عمرى كبر اذا مش هينفع ادخل المجال
الحقيقه لا بالرغم من انها كانت معتقد شخصي ليا وخصوصا فى بدايه دخولى للمجال وبعد كده الاعتقاد ده انقلب على الاخر الصراحه الموضوع ملهوش علاقه بالسن الموضوع موضوع اراده ورغبه وجوع انك تنجح وتحقق حاجه بتحبها ونفسك توصلها ( المعتقدات هى المعوق الاساس وليس اى شئ)
13- انا معندش وقت شغال على طول اذا انا انتاجيتى عاليه
الحقيقه لا كتر الشغل مش دايما معناه انك انتاجيتك عاليه او مستواك عالى حتى لو كده فعلا وقف شويه وسن منشارك من جديد ومنشارك هنا هى مهاراتك من فتره للتانيه لازم تقف وتحاول تطور من مهاراتك واسلوبك لانك بدون ما تسن منشارك انتاجيتك هتقل خالص وسوقك هيقل(من لم يتقدم يتقادم )
14- العملاء كلهم تعبنين وفلوسهم قليله اذا هشتغل على قد فلوسهم
الحقيقه لا مش كل العملاء تعبنين ولازم نفرق بين الزبون والعميل وحاجه تانيه انك مطورتش من نفسك ومغيرتش من مستواك علشان يجيلك عميل محترم متلومش حد غير نفسك وحاجه تانيه انت مش بتشتغل للعميل انت بتشتغل لنفسك فى الاول المفروض اى تصميم يخرج من تحت ايدك تسال نفسك ده افضل حاجه اقدر اعملها ولو قدوتك فى التصميم هيصمم التصميم ده كان هيخرجه ازى و هل انت فعلا راضي عن شغلك ولا انت عارف انك بتشتغل بدون اتقان ( كثير من الناس يريدون تغير ظروفهم ولكن لا يريدون تغير انفسهم ولذلك يبقوا كما هم )
15- انا مش بعرف انجليزى اذا هذاكر المحتوى العربى
لا مش معنى انك مبتعرفش انجليزى تفوت على نفسك العلم من اهله واصل المجال. المحتوى العربى وان كان فى ناس كتير مجتهده الا انهم بيبقى اجتهاد الا من رحم ربى لكن الاحتكاك ومذاكره المحتوى الانجليزى بيفرق فى مستوك بشكل كبير (لغه جديده = انسان جديد)
16-العميل رفض شغلى اذا انا مش شاطر
الحقيقه لا للاسف الشديد مش معنى ان العميل رفض الشغل يبقى شغلك وحش او يقلل من ثقتك فى نفسك فى عدده عوامل تؤدى الى رفض العميل 1-لازم تفهم دماغ العميل كويس جداااا 2-ممكن تكون اشتغلت فى اتجاه مختلف عن اتجاه و رويه العميل 3-ذوق العميل ممكن يكون متواضع فلازم نشف افكار من اللى عجبه العميل علشان نفهم دماغه 4-ممكن العميل يكون متردد او حد رايه اثر عليه (ثق بنفسك وبشغلك وانطلق)
17- انا محتاج فلوس اذا هشتغل اي شغلانه
لا ارجوك ديه اكتر مشكله بتقابل اللى شغال فري لانس لان دخله مش بيقى ثابت قابل للزياده والنقصان وبيبقي عليه عبئ مادي وملتزم بيه وانا اشتغلت فتره كده وحاسس بالكلام ده فافضل حاجه ان يبقي ليك دخل ثابت او على الاقل اللى يغطى تكاليفه ساعتها هيبقى ليك حريه الشغل وانك تختار اللى يناسبك واللى بتستمتع بيه ( الاستقرار المالي يحققك لك الاستقرار الفكري)
18- انا من اسره متواضعه اذا ابويا وامي السبب محدش اهتم بيا ولا بموهبتي
لا الحقيقه انك انت المسؤل عن تنميه نفسك وتطويرها ولازم تفهم ان الاب والام الاشخاص الوحدين اللى نفسهم يشوفوك افضل منهم واللى قدموه ليك ده اقصى حاجه قدروا يقدموها ليك انت بقى لازم تاخد مسؤلية حياتك وتورينا شطارتك والا اقعد اندب حظك مش عوزين نسمع منك شكوى علشان محدش فاضي انت المسؤل بيحاول يطور من نفسه (اذا رحمت فانت اب او ام هؤلاء فى الدنيا هم الرحماء)
19- ده عندوا 100.000 معجب اذا ده شغله جامد ومشهور
الحقيقه لا فى ناس كتير شغلها رائع ومش مشهوره بشكل كبير وناس شغلها عادى وعندها معجبين كتير مش ده المقياس وبستغرب جدااا من اللى بيشحت ليكات او يقول لو جابت كام ليك هكمل الرسمه او اللى حابب اكتبله اسمه او ارسمه يضغط ليك وشير انا بستغرب جدااااا من شغل الشحاته ده ارتقوا ارجوكم الشهره الحقيقه انك يقى ليك اسلوب ومهاره وتتعب على نفسك وتبقى عندك حاله من حالات السعاده وشغلك هيتحكى عنك عاجلا ام اجلا
20- انا مش معايا فلوس اخد كورسات اذا انا مش هعرف ابدا
الحقيقه لا الكلام ده ممكن كان يتقال زمان اما دلوقت بضغظ زر تعرف توصل وتتعلم وده بقى الصراحة بيكشف ضعفنا وقلة ارادتنا ان المعلومه قدامنا واحنا اللى مكسلين نتعلمها. اتعب على نفسك وملكش اى حجه انت مسؤل عن نفسك (الظروف لا تصنع انسان بال الانسان هو من يصنع الظروف )
كتابة وإعداد: سراج باسل
