نصيحة_تصميمية – موقع بيهانس

#نصيحة_تصميمية

هاد البوست فيه شرح طويل عن موقع بيهانس حضرتلكم إياه لما صورنا حلقات النصائح مع شركة DOT Media و بيعكس رأيي الشخصي و خبرتي في استخدام الموقع.

Behance.net

هو موقع الكتروني تابع لشركة أدوبي و الهدف منه عرض و اكتشاف أخر أعمال المصممين في العالم و من مختلف المجالات الإبداعية.
أنت كمصمم بتقدر تستفيد من الموقع بأكثر من طريقة:

1. بتقدر تستخدمه كبديل عن الموقع الشخصي الخاص فيك و هوه مقسم لقسمين:
   … القسم اللي عاليسار بمثل السي في تبعك فاهتم فيه و عبي فيه كامل بياناتك.
   … القسم الثاني اللي عاليمين و فيه البورتفوليو الخاص فيك و اللي لازم ترفع فيها فقط أفضل أعمالك.
2. ثاني استخدام للموقع هو أنك بتقدر تتابع و تكتشف أعمال مختلفة في أي مجال إبداعي بهمك و إنك بتقدر تتضيف أي عمل لمجموعاتك الخاصة (collections) لتقدر ترجع تشوفها و تدرسها و تتعلم منها متى ما بدك، بالإضافة لخاصية تخلي الكولكشن سرية ازا بتحب.
3. ثالث استخدام للموقع أنه بوفر فرص عمل مختلفة و من كل دول العالم في قسم اسمه Jobs. غالبية الفرص فيه في الدول الأجنبية، لسه عنا مش كتير مستخدم.

*بدنا نوصل لمرحلة انه المصمم ما يقدم سي في للشركات بل يرسللهم رابط حسابه عالبيهانس لأنه فيه السي في تبعه مع البورتفوليو الاي فيه أفضل أعماله.

الفيتشر على بيهانس:

1. الفيتشر على الموقع مش جائزة حقيقية لكن بتفيدك أنه الناس اول ما تفتح الموقع أو تبحث في مجال معين بتلاقي تصميمك اللي ماخد الفيتشر معروض مع أول مجموعات فبتزيد فرصك أنه الناس من مصممين و شركات تفتح مشروعك و تشوفه.
2. المئات و حتى الآلاف من المصممين بترفع مشاريع على بيهانس يوميا على بيهانس يوميا و اللجنة المختصة في اختيار المشاريع الفيتشرد بتختار أقل من 1% منهم.
3. مافي قوانين ثابتة لاختيار المشاريع للفيتشر بس في نقاط ممكن تاخدها بعين الاعتبار لتزيد فرصك:
   … ارفع مشروعك كامل مش ناقص أو لسه بدك اتضيف عليه لأنه المشاريع الناقصة ما بيطلعوا عليها، بالإضافة للتعديل كمان، المشروع اللي بيتعدل بعد رفعه بوقت بيفقد حقه في المراجعة ازا مرق دوره.
   … خلي عرض المشروع بسيط و ابداعي و باستخدام الوان و ثيم موحد للمشروع.
   … ارفع جودة أعمال عالية و بوضوح عالي. معك لكل حجم صورة تكون أقل من 50 ميجا.
   … حجم ال appreciations و comments بأثر على قرار الفيتشر.
   … المشروع مثاليا للزم يكون فيه ما بين 6 الى 20 صورة و بدون وضع ووترمارك فوق العرض.
   … صورة المشروع ( الكوفر الي ببين على بروفايلك) يفضل تكون صورة كاملة للمشروع خاصة ازا كان شعار مثلا و لزم اي شي فيها يكون موجود جوا المشروع.

نصائح في عرض المشاريع:

طريقة عرضك لمشروعك لازم يكون في تحكي قصة المشروع على شكل قصة بصرية للي بده يشوفها.

… قبل عرض أي مشروع بمرحلة التصميم و العرض على العميل لازم تقدم تصميمك اله و كأنه عرض لبيهانس بس مصغر. لما تيجي هلا بدك تصمم عرض لمشروعك بكون عندك عرض أساسي تشتغل عليه و تختار منه المحتوى المناسب للنشر و فيك تختار عرض أي واحد من الخيارات تنشرها من اللي قدمتهم للعميل مش شرط الخيار الي اعتمده العميل.
…. ابدا بعمل بحث و استلهام عن أجمل و أفضل المشاريع اللي مثل مشروعك أو حتى بمجال مختلف عن مجال مشروعك بس ممكن يلهمك بطريقة ما.
… العرض غالبا لمشاريع البراندينج تحديدا يفضل أنها تحتوي على صور التصميم نفسه، الخطوط المستخدمة، الألوان، الأيقونات(ان وجدت) و موكابس متقنة للتصاميم.
… بتقدر اتضيف على العرض صور متحركة، فيديوهات و الأحلى أنك تتضيف صور أو فيديوهات لعملية التصميم نفسها و تطوير الفكرة (process)
…المشروع لازم يكون فيه محتوى كنص مش كتير طويل فيه شرح عن المشروع وشو دورك كان في المشروع ازا كان فريق اللي قام فيه و ما تنسى تذكر أي حد اشتغل معك فيه ان وجد.

طريقة تصميم العرض لمشاريعك عالبيهانس:

بعد التجربة و عشان تقدر تعرض مشروع متكامل ملفت بدك تفكر أول، هل بدك المشروع يكون شرائح صور منفصلة أو حابب يكون في عناصر متداخلة بين الصور؟ مثلا بين شريحة عرض الخطوط المستخدمة و شريحة الألوان المستخدمة يكون في عنصر زي نبتة أو موكاب معين، على هاد الأساس بتفتح الأرتبورد تبعتك…
… في حال بدك يكون العرض منفصل مثاليا بتفتح ارتبورد عرضها 1400 بيكسل و طولها بين 750 و 1000 بيكسل، ألوان RGB و الريزولوشن 300 يفضل تكون حتى لو أنه عرض على موقع أونلاين. ابدا ضيف تصميمك و كرر الأرتبورد هاي.

…في حال بدك يكون عرض متواصل فيه عناصر متداخلة بتعمل نفس المواصفات اللي فوق بس الطول مفتوح و طويل على قد المحتوى تبعك، ممكن يوصل 3000 بيكسل او 4000. هلا بس تخلصه عندك خيارين، يا اما ترفع المشروع كله كارتبورد وحده طويلة او انك ترجع تقسم هاد المشروع لشرائح زي اللي فوق مع الحفاظ على العناصر المتداخلة مكررة على الشرائح الموجود عليها.

…. عادة الاتجاه المتداول في تصاميم البراندينج عالبيهانس للمشاريع المتقنة و اللي برضه بتاخد فيتشر تبدا بصورة الها علاقة بالمشروع او موكاب عليه تصميمك بعدين صوره فيها التصميم نفسه و بعد هيك الكونسيبت و صور موكاب و الخطوط و غيره.

… استخدم موكاب متقنة بس ما تكتر منها كتير و خليها كلها الها علاقة مباشرة بمشروعك، يعهي مش شرط كلالموكابس اللي عندك تستخدمهم و تكررهم على كل مشروع بتعمله.
استثمر سشراء موكابس احترافية كتير بترفع من قيمة و مستوى مشاريعك بالإضافة لصنع الموكابس الخاصةفيك بنفسك و الأفضل و المفضل تصوير حقيقي للتصميم مطبوع و منتج.

…صورة كوفر المشروع مقاسها 808 بيكسل في 632 بيكسل و لازم تكون تحتوي على صورة من داخل المشروع.

… غير موضوع انه يفضل حسابك يحتوي على تخصص واحد او تنين فقط من مجالات عملك، (مثلا انا برفع بس مشاريع البراندينج لاني بدي انعرف اني متخصصة في هالمجال حتى لو بعمل مشاريع مختلفة متنوعة)، لازم كوفر مشاريعك تكون متناسقة فيها تكرار معين، ( حسابي أغلبه فيه اللوجو بالوسط ووراه خلفية شفافة من جوى المشروع نفسه).

نصائح متفرقة لتستفيد أكتر من موقع بيهانس:

… استخدم كل الفيتشرز اللي بقدملك اياها الموقع مثل فرص العملو الاحصائيات (statistics) اللي فيها بتقدر تقيم بالأرقام شو أكتر المشاريع اللي عليها تفاعل و أيا أنجح نوع مشاريع عندك أنت.

… عند اشتراكك ببرامج أدوبي بيطلعلك موقع شخصي مجاني بتقدر تختار اي ثيم بناسبك و تعدل عليه و حتى الهوستينج عليهم بكون. الموقع هاد بتقدر تاخد كل مشاريعك من بيهانس زي ما همه عليه و بتقدر تعدل او ترفع مشاريع جديدة على موقعك او تلغي منهم شو ما بدك.

… الموقع بقدملك خدمة معرفة موقعك في بلدك أو عالميا و حسب الفلاتر الموجودة ليخلق روح تنافس و انك ترتفع بالقائمة خصوصي بين المصممين و المشاريع اللي من تخصصك انت.
هلا النتيجة مش صحيحة طبعا مية بالمية لأنه غي عوامل كتير بتأثر على النتيجة، يعني أعلى واحد مش شرط أشطر واحد، ممكن موجود قبلك عالموقع و ممكن عنده مشروع بقدم موارد مجانية مثلا خطوط او موكابس و هكذا لكن بيعطي مؤشر الك على مدى تاثير حسابك في الموقع.
هاد الفلتر بيستخدموه الشركات في البحث عن مصممين، مثلا بيفتح على مصممين البراندينج في الاردن او حتى عمان و بشوف مين أعلى ناس موجودة 6 بيتواصلوا معهم.

… اعمل فولو لأفضل المصممين و المبدعين برأيك لحتى تقدر ترغع مستواك للأفضل بالمقارنة.

…. رتب مشاريعك و عيد تصميم المشاريع الي عرضها ضعيف و المشاريع اللي مستوى تصميمها بتشوفه مش قوي الغيها لكن ما تعمل delete للمشروع، اعلمه unpublished لحتى ما تخسر عدد المشاهدات و appreciations اللي عليه.

***بالنهاية ارفع فقط أفضل أعمالك و حاول يكونوا من نفس تخصص التصميم لأنه أسوأ عمل عارضه عندك يمثل مستواك الإبداعي للمتلقي.

You are as good as your worst work.

بالتوفيق للجميع 🙏🏻👑
#hadeelsahmad

كتابة: هديل سيد أحمد – إتحاد المصممين