مش مهم انت قد ايه مستواك جيد اليوم .. المهم هو مدى سرعة تقدمك والخطوات التي بتعملها كل يوم لتحسين مهارات التصميم الخاصة بك
ولكى تجعل نفسك مصمم محترف وفي تطور دائم لازم تتبع أسلوب قوى ومميز
هنتكلم هنا عن 5 أساليب قوية جدا لتحسين مهارات التصميم
وهم :
أول أسلوب : اتعلم ازاى تعرف التصميم الجيد
ثانى أسلوب: اتعلم نظرية التصميم
ثالث أسلوب: انشأ حقل تجاربك الخاص
رابع أسلوب : طور اسلوبك
خامس أسلوب : علم الآخرين ما تعلمته
*** اتعلم ازاى تعرف التصميم الجيد ***
لو انت عايز تعمل تصميم ، فانت محتاج الأول تعرف التصميم الجيد والتصميم السيئ ، وهي فى العادة بتيجى من الخبرة وكثرة الأعمال .
كل ما خبرتك ذادت فى التصميم .. كل ما تبقى اسرع فى الحصول على تصميم أفضل.
ومش تنسى ان ” كل فنان كان فى البداية هاوى ”
وبناء عليه لازم تدرب نفسك لإتقان المهارة الثمينة ديه كل يوم
والقاعدة بسيطة جدا ، حاول دائما انك تستعرض مشاريع تصاميم يوميا ، ابدا يومك بإلقاء نظرة على أحدث التصاميم المعروضة وتفحص اعمال المصممين الموهوبين والخبرة الأخرى .
ادرس التصميمات الجيدة وحاول ديما الإجابة على السؤال ده ..
“ما الذي يجعلها جيدة ؟”
ركز على عناصر تصميم محدده زى مثلا (الأزرار ، الأشرطة ، الاشكال ، الصور ، الخ …) وقارنها بأمثلة أخرى ، وحاول تخمين ليه المصمم اختار الطريقة ديه او الشكل ده بالذات…
وفى نهاية العملية ديه ارسم كل الافكار اللى جت فى دماغك على قد ما تقدر.
وخلى بالك تطوير قدرتك على معرفة التصميم الجيد زى بالظبط بنيان العضلات فى جسمك ، انت فقط محتاج تدريب باستمرار علشان تخليه اقوى وافضل .. واوعى تفكر انها حاجة المصمم بيتولد بيها .. بالعكس انت تقدر تتعلمها
وديه لينكات لاشهر موقعين لعرض اعمال المصممين المحترفين على مستوى العالم
https://www.behance.net
https://www.pinterest.com
*** اتعلم نظرية التصميم ***
كل شيء بيتحرك بسرعة وإذا كنت عايز أن تكون في اللعبة، فأنت محتاج تعرف المعلومات بتاعتك من مصدرها الحقيقي.
لازم ديما تقرأ عن تقنيات التصميم والتكنيك (techniques) المستخدمة فيها وشوف احدث الترندات (trends)
ذاكر نظريات التصميم و افهمها كويس لحد لما توصل للسنسن (sense) فى الأعمال اللى بتقدمها ، وعلى الرغم من ان مشاهده التطبيقات والدروس الاحترافية شيء مغرى جدا ، الا انه مش هيحسن مهارات التصميم الخاصة بيك للأفضل إلا بجزء بسيط .
فى الحقيقة التصميم الجيد لا يبدأ من برامج التصميم مثل ( الفوتوشوب ، والاليستريتور ، الخ … ) ولكن يبدأ فى راسك اولا وعلى الأوراق ثانيا .
اتعلم وحاول تفهم نظرية التصميم الاول وبعد كده ابدأ ضيف الغطاء المرئى للتصميم فى الاخر .
نظريات التصميم مختلفة وكتير ومنها :
Similarity
Continuation
Closure
Proximity
Figure/Ground
Symmetry and order
تقدر دلوقتى تستخدم اسماء النظريات ديه كمفاتيح للبحث عن نظريات التصميم ودية مفاتيح اخرى للبحث ( Design Thinking, Design Theory ) .
وان شاء الله هبقى اتكلم عن بعض نظريات التصميم بشكل تفصيلي فى مقال مستقل
*** انشأ حقل تجاربك الخاص ***
قم بإنشاء مكان خاص بك بحيث تقدر تجرب فيه حاجات جديدة ، وليكن مثلا موقعك الخاص او بعض المشاريع التي عادتا ما تكون خامة جيدة للبداية منها واخراج تصميمات متميزة.
اتعامل معاها على انها تجربة جديدة ومش تخاف تستخدم فيها ترتيبات غريبة أو ألوان غير معتادة ، ولا تكتفى باول فكرة تأتي الى ذهنك فى البداية فقط ، لان ده ملعبك الخاص فى الاساس .. والمسؤل عن تدريبك هو نفسك ^_^
وبكده تكون قضيت بعض الوقت الممتع وبقيت مبدع ^_^
طيب لو انا مش عندى مشاريع خاصة ؟!
فى الحالة ديه أنشأ مشروع وهمى يكون خاص بك او تظاهر انك بتعمل الشغل ده لشخص أو عميل ما ، واذا كنت انت مبتدأ فالمشروع الوهمى ده هيساعدك انك تبنى محفظتك الخاصة ( portfolio ) وتظهر فيها أعمالك ومهاراتك ^_^
*** طور اسلوبك ***
فى اوقات كتير بيكون فيها المصمم زى الفنان اللى بيستخدم قواعد مختلفة ومتغيرة على حسب المشروع اللى بيكون شغال فيه ، ومع ذلك فمن الجيد أن يجد المصمم مجموعة من العملاء اللى بيثق فيهم و يتناسبو مع أسلوب تصميمه الخاص .
وعلى سبيل المثال : انا بفضل وبميل للتصاميم البسيطة والنظيفه لانى بحس ان ده هو المنهج الأفضل لقطاع الأعمال ، والشركات والمواقع الضخمة ذات المحتوى الثقيل
ومحفظتى الخاصة فيها مشاريع كتير من الانواع ديه .. والناس عادة ما يعرفون ما يمكن توقعه مني .
حاول دائما انك تجد اسلوبك الخاص اللى تحس معاه بالجودة والتميز
وإذا كان هناك مجموعة كبيرة نسبيا من العملاء ( حتى لو كانت متخصصة ) تجد التصميم الخاص بك جذاب .. فأنت على الطريق الصحيح ^_^
استمر فى تطوير أسلوب التصميم الخاص بك ودخل عناصر جديدة فى كل مشروع جديد
فكر فى أسلوب تصميمك الخاص على انه علامتك التجارية ، وانت عايز الناس تتعرف على عليها وعلى اعمالك .
وافضل مكافأة ليك ان يحاول مصممين اخرين نسخ أعمالك ^_^ ، والموضوع ده مزعج شوية لكن خليك فخور بنفسك وعارف انك انت الاصل .
*** علم الآخرين ما تعلمته ***
والخطوة دى مهمة جدا جدا
من سنتين اخدت قرار انى ابدا اشرح برنامج ادوبى فوتوشوب وبدأت اعلم المبتدئين من الصفر يعنى ايه تصميم و ازاى اصمم ، وكنت بحس دائما ان مش انا الشخص اللى اقدر اقف واشرح واعلم الآخرين لانى كنت شايف نفسى مازلت لسة بتعلم ، ولكن اكتشفت ان مشاركة معلوماتي هى طريقة قوية جدا للتعلم ايضا..
كتابة وتجهيز محتوى تعليمى عن التصميم يساعدك على تنظيم أفكارك وتحديث معرفك اللي تمتلكها من قبل ، وكمان الموضوع يتطلب بعض البحث والأمثلة ، واللى بدورهم بيخلوك تعرف عن الموضوع اللى بتقدمه بشكل اعمق وافضل .
ولذلك تعليم الآخرين ما تعرفه هو بالتأكيد فكرة جيدة وخطوة مهمة يجب ان تأخذها لو انت جاهز ليها
————————————————————–
الأساليب ال 5 دى مش مجرد مجموعة خطوات المفروض تخطوها بترتيب ثابت واحدة ثم الأخرى ، هما فى الغالب زى الاكشن اللى انت محتاج تعمله بشكل متوازى و منتظم ومتكرر باستمرار
حتى لو انت مصمم محترف وحاسس انك فعلا فى مستوى عالى ، فأنت مازلت بحاجة لدراسة مشاريع التصميم الأخرى ، وإعادة تحديث كل نظريات التصميم لديك وتعلم اكثر من تكنيك جديد وتحسين اسلوبك ومشاركة ما تعلمته مع الآخرين
قد يكون من الصعب ان تحدد ما إذا كنت تتقدم فيما تفعل ام لا
ولكن إذا أعجبت بتصميمك فى لحظة العمل فيه .. وبعدها بفترة معينه مش عجبك لما قارنته بالمشاريع الجديدة اللى عملتها .. فده معناه انك فعلا احرزت تقدم.
ولو انت بتشوف اختلاف فى كل مشروع جديد بتعمله .. فده معناه انك بتحقق تقدم سريع جدا وماشى فى الاتجاه الصح
ودلوقتى ممكن انت كمان تقول ايه الأساليب اللى بتحسن بيها مهارات التصميم الخاصة بين ^_^
كتابه وإعداد: ايمن النجار
