في خلال الأسبوع اللي فات أكتر من حد طلب مني أتكلم أكتر عن الـ Graphic Design خصوصاً أنه مجالي الأساسي، سواء كنت بتفكر تعمل Career shift أو مهتم بالتصميم بس مش عارف تبدأ إزاي أو إيه الحاجات اللي المفروض تعملها علشان تقدر تبقي في مستوي أحسن فيه أو حتى بتحب التصميم وحابب تتعلمه بشكل أفضل المقال دا هتكلم فيه عن حاجات كنت أتمنى أعرفها وانا في المرحلة اللي أنت فيها دلوقتي.. وأيوة كلنا مرينا بالمرحلة دي.
أول وأكتر حاجة بتميز مجال الـ Graphic Design هو أنه أي حد خياله واسع وبيفكر بالشق الأيمن من دماغه -تفكيره شمولي وإبداعي مش تحليلي يعني- حرفياً يقدر يبقي مصمم! التصميم ببساطة عملية فكرية بشكل كبير، لما بشتغل على تصميم أو فكرة ما انا بعملها في دماغي بالكامل وبعدها ببدأ أنفذها فا لو عملناها في صورة نسبة مئوية ممكن تكون 70% خيال وتفكير و30% بس مهارة في التعامل مع برامج التصميم المختلفة لأنها ببساطة وظيفتها هي مساعدتك في تحويل الأفكار اللي في دماغك لحقيقة ملموسة أو مرئية مش أكتر ولا أقل فا لو هتتعلم التصميم قبل ما تفكر تتعلم الـ Photoshop مثلاً اتعلم التصميم بشكل عام وإزاي تفكر كمصمم لإنك لو خبير في الفوتوشوب لكن معندكش أفكار مش هتنتج حاجة! ولو هنتكلم بلغة الماركتين ونقول “Content is the king” يبقي من حيث الشغل انا مقتنع تماماً إن ” Designer is the King” لسبب بسيط جداً إن المصمم يقدر يشتغل بشكل منفرد ومش لازم يكون مرتبط بفريق عمل كامل وحتى دوره في الفريق بيكون غالباً آخر وأهم حاجة، وفي الحقيقة دي نقطة قوة جداً في التصميم ومن أسباب أنه واحد من أكتر المجالات اللي عليها طلب في مواقع الفريلانسينج المختلفة.
بعد ما عرفت سبب كافي يخليك تحب تكون مصمم، لازم تعرف إيه هو التصميم أصلاً، وفقاً لـ Wikipedia “التصميم الجرافيكي هو عملية الاتصال المرئي وحل المشكلات من خلال استخدام الكتابة والصور والرسم التوضيحي.” بعيداً عن الكلام الأكاديمي انا التصميم بالنسبالى هو ببساطة “عملية نقل رسالة” أنت كمصمم دورك الأساسي هو إنك توصل رسالة معينة وبتستخدم عناصر التصاميم المختلفة علشان توصل الرسالة دي (ركز في الجملة علشان شرحها هياخد مقال كامل فيما بعد).
بعد ما عرفت ليه تبقي مصمم وعرفت إيه هو التصميم أصلاً، هبتدي أشرح مبادئ وأساسيات بسيطة تخليك تقدر فعلاً على الأقل تبدأ في مجال التصميم حتى لو مكنش عندك أي خبرة فيه قبل كدا.
1- الألوان
أول حاجة بعد ما تقول بسم الله الرحمن الرحيم هي إنك تقرا كتاب “The Language of Colors” -هتلاقي نسخة مترجمة منه في أول كومنت- لو مش دي أول حاجة هتعملها بعد ما تقرا المقال نصيحة شخصية متكملش قراءة! الألوان بعتبرها أهم عنصر في التصميم وهي أهم عنصر في حياتنا بشكل عام، لازم تعرف كويس جداً سيكولوجيا الألوان، وإيه دلالات كل لون؟ وأمتي وليه تستخدمه؟ وتستخدمه مع مين؟ وإزاي توظف الألوان في نقل الرسالة اللي بتحاول توصلها في التصميم؟ الألوان لازم تبقي صديقك المفضل كمصمم لازم تعرف إزاي تتعامل معاها والاهم إنك تحسها وأنت بتستخدمها، على سبيل المثال لو جبت صورة فيها 6 ألوان مثلاً مترتبين من الأدفى للأبرد أو العكس هتحس إحساس مختلف تماماً عن أي ترتيب تاني ليهم، مجرد ترتيب الألوان بس هيعمل فرق كبير في الإحساس فا تخيل حاجات تانية زي اختيار الألوان ذات نفسها.. أعتقد الفكرة وصلت. طبعاً الألوان هي عنصر من 6 عناصر أساسية في التصميم وهما (الخط/ الشكل/ الاتجاه/ الحجم/ الملمس/ وأخيراً اللون) بس انا اتكلمت عن الألوان لأنها الأكثر أهمية، باقي العناصر ممكن تعرفها من أي مصدر بسهولة.
2- مبادئ التصميم الستة:
تاني حاجة لازم تعرفها، سواء كنت محترف أو لسا بتبدأ ولو كنت بتشتغل على أكثر التصاميم تعقيداً أو أبسطها فا أنت في كل الحالات بتستخدم المبادئ الستة للتصميم والي لازم تعرفهم عن ظهر قلب لأنهم أساس كل ما يمكن أن يقال عنه أنه تصميم
1. الفضاء أو المساحة:
المساحة في التصميم هي المنطقة فوق، تحت، يمين، شمال أو حتى جوا العناصر نفسها، المساحة بتنقسم لجزئين مساحة موجبة وهي اللي بيكون فيها العنصر ومساحة سالبة وهي المساحة اللي فيها الفراغ، الاعتماد على المساحة السالبة والموجبة من أهم العوامل في التصميم من حيث الأحساس وكمان توصل الفكرة لأنها بتستخدم في عمل شعارات عبقرية زي شعار Ed’s Electric مثلاً.
2. التوازن:
التوازن في التصميم أشبه بالتوازن في حياتنا بشكل عام، التوازن بيوفر الاستقرار والقوة في التصميم ودي عوامل بتخلي التصميم مريح بصرياً وجذاب أكتر، تخيل إحساس إنك تشوف صورة لدوائر مثلاً جوا مربع بشكل عشوائي وإحساس إنك تشوف دوائر جوا مربع بتوازن زي إن الدوائر الأكبر قريبة من النص والصغيرة قريبة من طرف المربع أكيد أحساس مختلف!
3. المحاذاة أو الترتيب:
المحاذاة في التصميم هي إنك تنظم العناصر المختلفة في التصميم وتعمل بينهم اتصال وعلاقة تربطهم ببعض، ودا هينتج عنه تصميم منظم أكثر وسهل الفهم والربط بالنسبة للمتلقي ودي حاجة هتساعدك في إنك توصل رسالتك من التصميم بشكل أكبر وأسرع.
4. التناقض أو التباين:
التباين بيدخل في كتير من عناصر التصميم اللي ذكرتها فوق وبعتبره من أكتر المبادئ أهمية واستخدام في حياتنا بشكل عام، مثال حي على التباين هو إن وأنت بتقرأ المقال دا اللون المستخدم في الكتابة أسود ودا عكس تماماً لون الخلفية الأبيض والنتيجة إنك بتقرأ بسهولة والكلام بالنسبالك أوضح بكتير من إنه يكون رمادي مثلاً، هو دا باختصار التباين إنك تختار ألوان متقابلة على عجلة الألوان مثلا (هتفهم أكتر في الكتاب) أو تناقض بين عنصرين علشان تأكد على واحد منهم بشكل أقوي.
5. التقارب:
التقارب هتحسه قريب جداً من المحاذاة بس يختلف، قرب العناصر من بعضها أو بعدها أو المسافة بينها بشكل عام بتكون علاقية بينها وبين بعض، يعني تخيل لو شوفت تصميم في طرفه اليمين مربع وطرفه الشمال مربعين فوق بعض أكيد مش هتحس بعلاقة بتربطهم ببعض لكن لو بقوا كلهم جنب بعض بمساحة متساوية ساعتها هتحس بعلاقة أوضح بدأت تظهر بينهم.
6. التكرار:
التكرار مش المقصود بيه إنك تكرر نفس العنصر أكتر من مرة، التكرار في التصميم معناه إنك تربط العناصر الفردية بعد تكرارها بأحجام مختلفة على سبيل المثال ودا بيخلي فيه أحساس بإيقاع معين للشكل الكلي أو حركة أو اتجاه ليهم كدا يعني.
طبعاً المبادئ دي انا متكلم عنها بشكل مختصر علشان أديلك فكرة مبدأيه عنهم لكن كل مبدأ ممكن تقرا عنه كتاب كامل منفصل أصلاً، بشكل كبير الإنفوجراف دا bit.ly/2KlpZNr هيشرحهم بشكل أكتر توسعاً وأنت دور فيهم أكتر ولازم تعرفهم لأن شغلك بيعتمد عليهم فوق ما تتخيل.
3- بعد ما عرفت عناصر ومبادئ التصميم الأساسية لازم بقي تحدد انت هتعمل إيه بالظبط، الـ Design دي كلمة واسعة جداً وبيدخل فيها مئات المجالات، بشكل أساسي أكتر 3 مجالات انتشاراً من التصميم هما
Graphic Design – Web Design – Industrial Design
هنفترض إنك اخترت مجال الـ Graphic Design هنا بقي مهم تعرف أنه برضه بيحتوي على مئات التخصصات اللي يمكن أشهرهم
Photo manipulation – Retouching – Logo Design – Brand Identity design – Printings – Advertisement – Typography & Typeface Design – Packaging – Illustration … etc.
كل دي تخصصات من كتير من التخصصات في مجال الـ Graphic Design يعتبروا الأشهر والأكثر انتشاراً، دورك بقي إنك تاخد نبذة بسيطة أو تعرف أكتر عن كل مجال من المجالات دي وتختار أكتر حاجة حبيتها وشايف نفسك كويس فيها وتبدأ تشتغل فيها بس وبشكل متخصص، مشكلتنا في مصر إننا لسا موصلناش لثقافة التخصص واللي من أسباب إننا بنشوف الغرب مميزين جداً مثلاً! السر في دا ببساطة هو كلمة واحدة “التخصص” تخيل مثلاً لو أنت تركيزك على إنك تشتغل في 4 مجالات من دول، النتيجة إنك هتحتاج 4 أضعاف الوقت اللي كنت هتتعلم فيه مجال واحد وتتقنه -على الأقل- وكمان بنسبة كبيرة مش هتتقن كل المجالات وتبقي فعلاً مميز فيها هتلاقي نفسك نسب معينة من كل مجال لكن مش +95% في مجال واحد! لكن لما تختار مجال واحد -أو أتنين على الأكثر- بس وتبدأ في تعلمه ساعتها دا هيبقي أسهل جداً وهياخد وقت تعلم أقل والأهم إنك هتتطور فيه بشكل أسرع بمراحل، مش بقول إنك تختار مجال وتتعلمه ومتعرفش حاجة عن الباقي لأ انا زي ما قولت فوق ” دورك بقي إنك تاخد نبذة بسيطة أو تعرف أكتر عن كل مجال من المجالات دي” يعني أعرفها على الأقل بس متحاولش تتعمق فيها لإنك كدا هتشتت نفسك وتضيع وقتك والقاعدة بسيطة “اعرف شيء عن كل شيء واعرف كل شيء عن شيء” ولو معرفتش تحدد إيه المجال المناسب ليك بكل بساطة جرب نفسك في أكتر من تخصص لحد ما توصل للتخصص اللي هتحس فعلاً إنك حابب تعمله وإن هو دا اللي هتكمل فيها، وبتمنالك فيه كل التوفيق من ناحيتي.
4- إزاي أطور نفسي؟
أغلب الناس في المرحلة دي بعد تحديد مجالها بتبدأ تسأل نفسها إزاي أطور نفسي وإيه الكورسات اللي محتاجها مثلاً؟
في مجالات بتحتاج كم كبير من المعرفة النظرية زي الـ Logo Design مثلاً وفي مجالات تانية بتعتمد على الاستلهام المباشر والـ Tutorials زي الـ Retouch مثلاً مصادر المعرفة في كل الحالات كتير ومتاحة لكل الناس الأهم من إنك تتعلم إنك الأول تعرف إزاي وليه تتعلم، كنت كتبت مقال مكون من جزئين في النقطة دي تحديداً فا أي كلام هنا هقوله هيكون مختصر او مكرر، هتلاقيهم في أول كومنت وهتلاقي فيهم كل المصادر اللي هتعتمد عليها في التعلم وإزاي تستغلها صح.
هتكلم بس في نقطة إضافية مش موجودة في المقالين وهي التعلم بالمحاكاة او التقليد، أولاً مش عيب ولا غلط أصلاً إنك تعمل دا بالعكس دا من أفضل الوسائل اللي هتتعلم بيها تصميم إنك تتعلم بالتقليد وانا شخصياً كنت بعمل في المرحلة دي كتير كمان!
علشان محدش يفهم كلامي غلط اللي اقصده في التعلم بالتقليد أو الهدف الأساسي منه هو التدريب أو اكتساب مهارة تكنيك معين في التصميم، على سبيل المثال انا فاكر أني كنت بشوف حاجات ما مثلاً وبسأل نفسي هي اتعلمت إزاي؟ وعلشان اعرف الإجابة كنت ببدأ أحاول انفذها فعلاً علشان أتدرب على التكنيك دا او علشان أحاول أعرف إزاي انفذه فعلاً وأكتسبه، دا الهدف الأساسي لكن مينفعش إطلاقاً تنسب الشغل دا لنفسك مثلاً أو تعتمد على كدا في شغلك نفسه طبعاً.
5- التغذية البصرية والاستلهام
التغذية البصرية والاستلهام المستمر دي حاجة لازم تعملها سواء كان عندك خبرة 20 سنة في مجال الـ Graphic Design أو لسا بادئ حياتك التصميمة إمبارح! شخصياً انا مخصص نص ساعة لحد 3 ساعات يومياً -علي حسب اليوم- بقضيها في الاستلهام علي www.be.net بس ودي حاجة تحولت بالنسبالى لعادة بعملها كل يوم، الاستلهام والتغذية البصرية من أهم الحاجات اللي هتفيدك كمصمم وتساعدك تحسن مستواك في أسرع وقت حرفياً، بس في نقطة لازم تعرفها الأول وهي إنك لازم تشوف شغل جودته عالية حتي لو كان بعيد عن مجالك (يفضل طبعاً أنه يكون في مجالك) لأن اللي بيحصل أن كل التغذية البصرية مع الوقت بتتخزن في عقلك الباطن وبتبدأ تنعكس على شغلك بشكل كبير من غير حتي ما تلاحظ دا بس هتدركه مع الوقت ودا السبب اللي مخليني أقول إنها من أسرع الحاجات اللي هتساعدك تطور من نفسك، بس للأسف ليها جانب سلبي وهو إنك من كتر الاستلهام ممكن تكتشف إنك عملت حاجة انت فعلاً شوفتها قبل كدا بس مش فاكر دا أو إنك تعمل شغل مقارب لحاجة بتشوفها والحل في إنك تتغلب على النقطة دي هي إنك تنوع مصادر الهامك بقدر الإمكان وتحاول تطور في أفكارك وانت بتنتجها.
6- طور ستايل خاص بيك
دي آخر نقطة هتكلم فيها وتعتبر آخر مرحلة هتوصلها وهتاخد حبة وقت فا متستعجلش عليها وهي إنك تطور ستايل يكون خاص بيك وبيعبر عنك، في مصممين لو شوفت شغلهم مش هتحتاج تشوف اسمهم عليه علشان تعرف أنه شغلهم
على سبيل المثال ستايل كريم مرغني في التايبوجرافي، حاجة مميزة جداً وهو قدر يطورها لحد ما بقت ستايل خاص بيه وبيعبر عنه بشكل كبير ودا هيخلي أي حد بيشوف شغله بيربطه بيه بشكل تلقائي، زي ما قولتلك دي مرحلة متقدمة في التصميم بس مهم تعرفها وتحط تركيزك عليها وتفكر فيها دايماً وانت شغال لإنك لو معملتش كدا مش هتقدر تبقي مميز عن غيرك وممكن كمان تبقي تقليدي لو ما اشتغلتش على تطوير نفسك وستايلك الخاص.
الموضوع كبير وممكن يحتاج كم كبير من المقالات انا بس في المقال دا حبيت أوصلك حاجات مهمة وشخصياً كانت هتفرق معايا كتير لو كنت عرفتها في الوقت دا، إن شاء الله هتكلم في مقالات أكتر عن التصميم وتكملة للمقال دا في مقالات جاية هشارك فيها كم أكبر من التجارب والخبرة اللي ممكن تفيدك بشكل ما.
لو عندك أي سؤال متعلق بالتصميم ممكن تسأله في كومنت وهحاول أفيدك على قد ما أقدر 
❤️
وأعمل شير للبوست علشان تساعد أي حد بيفكر يبدأ في مجال الـ Graphic Design لأن الحاجات دي هتسهل عليه كتير، شكراً.
