كان نفسى لما ابدأ الاقي حد يقولي

ان علشان ادخل مجال الجرافيك لازم امشي في 4 طرق مع بعض علشان انجح فيه.

اول طريق: البرامج 

لازم اتعلم كل البرامج بداية الفوتوشوب و الاليستروتر لغايت المونتاج و الافتر و برنامج 3D و امسك كاميرا و اعرف الفرق بينهم و اجرب اصور صور عادية وفيديو وكل حاجة فى المجال والنقطة دي مهمة علشان بتخليك سريع وسريع وفاهم مراحل الشغل و سريع . كل برنامج بيبقى فيه كام ميزة كده تخليك تخلص شغل اسبوع فى زرار.

تانى طريق : الفن

علشان تصميم يبقى صح و مريح للعين لازم ادرس اسس الفنون ابتدي من اسس تصميم جرافيك و يعني ايه منظور حر ومنظور هندسى و كل الكلام الى ليه علاقة بالفن ووزن التصميم النفطة دي المسؤولة علشان شغلك يطلع موزون مريح للعين

تالت طريق : الاعلان

للاسف ناس كتتير فاهمة تصميم بس مش فاهمة اعلانات ، تلاقي التصميم قوى بس مش بيجيب فلوس، هنا بنبتدي ندرس الناس بيفكروا ازاي وبيحبوا ايه وبيكرهوا ايه، ايه الى يجزبهم ويخليهم يشتروا. مش مهمتنا ان التصميم يعجب العميل على قد ما مهتنا انه يشتري هوا علم قريب من التسويق والمبيعات بس ليه علاقة بالتصميم النقطة دي . لو مستواك 30% فى التصميم هتعرف تشتغل لان الناس الي بتاخد بالها من الحكاية دي فى المصممين بيتعدوا على الايد.

النقطة الرابعة : العلاقات

طبعا لو معاك كل الي فوق دول بس يبقى ملكش لازمة لان محدش يعرفك ومفيش شغل وخد بالك العلاقات مش لازم يبقى بابا مدير شركة او ماما سفيرة،  لا دي اسمها واسطة انما العلاقات يعني ناس هتفيدهم وهيستفادوا منك. يعني انت مثلا مصمم وشغلك القوي في السوشال ميديا يبقى تبني علاقات وتعرف ناس كتتير شغالة في المجال ده وتخليهم يعرفوا انك مصمم جرافيك،  هنا كده بتبتدى تنبى علاقاتك و هيبتدي يجيلك شغل ولازم تاخد بالك من حاجة ان لو مستواك ضعيف العلاقات دي ملهاش لازمة لو مستواك عالي فا واحد يعرفك ومبسوط منك كفاية ان يخلي نص المجال يتعامل معاك.
………………….
هوا فى تكملة للبوست بس انا قولت كفاية عليكوا كده و الاسبوع الجاي ننزل الباقي

لمتابعة اعمال الزميل: احمد جمال